ਬੀਜਿੰਗ : ਉੱਤਰ ਪਛਮੀ ਚੀਨ ਵਿਚ ਬੇਹੱਦ ਖ਼ਰਾਬ ਮੌਸਮ ਕਾਰਨ 100 ਕਿਲੋਮੀਟਰ ਕਰਾਸ ਕੰਟਰੀ ਪਰਬਤੀ ਦੌੜ ਵਿਚ ਭਾਗ ਲੈਣਵਾਲੇ 21 ਲੋਕਾਂ ਦੀ ਮੌਤ ਹੋ ਗਈ। ਸਰਕਾਰੀ ਖ਼ਬਰ ਏਜੰਸੀ ਮੁਤਾਬਕ ਗਾਂਸੁ ਸੂਬੇ ਵਿਚ ਸੈਰਸਪਾਟਾ ਸਥਾਨ ‘ਯੇਲੋ ਰਿਵਰ ਸਟੋਲ ਫ਼ਾਰੈਸਟ’ ਵਿਚ ਮੈਰਾਥਨ ਵਿਚ ਭਾਗ ਲੈਣ ਵਾਲੇ ਲੋਕਾਂ ਨੂੰ ਤੇਜ਼ ਹਵਾਵਾਂ ਅਤੇ ਬਰਫ਼ੀਲੇ ਮੀਂਹ ਦਾ ਸਾਹਮਣਾ ਕਰਨਾ ਪਿਆ। ਪਰਬਤੀ ਮੈਰਾਥਨ ਵਿਚ ਕੁਲ 172 ਲੋਕਾਂ ਨੇ ਭਾਗ ਲਿਆ ਸੀ। ਸਨਿਚਰਵਾਰ ਸਵੇਰੇ ਨੌਂ ਵਜੇ ਤਕ ਮ੍ਰਿਤਕਾਂ ਦੀ ਗਿਣਤੀ ਵੱਧ ਕੇ 21 ਹੋ ਗਈ। ਬਾਕੀ ਠੀਕ ਹਨ ਅਤੇ ਕੁਝ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ। ਦੌੜ ਵਿਚ ਭਾਗ ਲੈਣ ਵਾਲੇ ਕੁਝ ਲੋਕਾਂ ਦੇ ਲਾਪਤਾ ਹੋਣ ਮਗਰੋਂ ਦੌੜ ਰੋਕ ਦਿਤੀ ਗਈ। ਸਥਾਨਕ ਸਰਕਾਰ ਨੇ ਲਾਪਤਾ ਲੋਕਾਂ ਦੀ ਭਾਲ ਲਈ ਉਪਕਰਨਾਂ ਨਾਲ ਲੈਸ 1200 ਤੋਂ ਵੱਧ ਬਚਾਅ ਕਾਮਿਆਂ ਨੂੰ ਕੰਮ ਵਿਚ ਲਾਇਆ। ਰਾਤ ਨੂੰ ਤਾਪਮਾਨ ਮੁੜ ਡਿੱਗ ਗਿਆ ਜਿਸ ਕਾਰਨ ਬਚਾਅ ਕਾਰਜਾਂ ਵਿਚ ਮੁਸ਼ਕਲ ਆਈ।