ਮੁੰਬਈ : ਅੰਧੇਰੀ ਇਲਾਕੇ ਦੇ ਚਾਂਦੀਵਾਲੀ ਵਿਚ 44 ਸਾਲ ਦੀ ਔਰਤ ਰੇਸ਼ਮਾ ਤੇਂਤਰਿਲ ਨੇ ਅਪਣੇ 7 ਸਾਲ ਦੇ ਬੇਟੇ ਗਰੁਣ ਨੂੰ ਲੈ ਕੇ 12ਵੀਂ ਮੰਜ਼ਲ ਤੋਂ ਛਾਲ ਮਾਰ ਦਿਤੀ ਜਿਸ ਕਾਰਨ ਦੋਹਾਂ ਦੀ ਮੌਤ ਹੋ ਗਈ। ਰੇਸ਼ਮਾ ਸਾਬਕਾ ਪੱਤਰਕਾਰ ਸੀ ਅਤੇ ਇਕ ਮਹੀਨੇ ਪਹਿਲਾਂ ਕੋਰੋਨਾ ਕਾਰਨ ਉਸ ਦੇ ਪਤੀ ਦੀ ਵੀ ਮੌਤ ਹੋ ਗਈ ਸੀ। ਪੁਲਿਸ ਮੁਤਾਬਕ ਰੇਸ਼ਮਾ ਨੇ ਗੁਆਂਢੀ ਦੇ ਮਿਹਣਿਆਂ ਤੋਂ ਤੰਗ ਆ ਕੇ ਖ਼ੁਦਕੁਸ਼ੀ ਕੀਤੀ ਹੈ। ਸੁਸਾਈਡ ਨੋਟ ਵਿਚ ਰੇਸ਼ਮਾ ਨੇ ਅਪਣੇ ਗੁਆਂਢੀ ਅਯੂਬ ਖ਼ਾਨ ਅਤੇ ਉਸ ਦੇ ਪਰਵਾਰ ’ਤੇ ਮਾਨਸਿਕ ਰੂਪ ਵਿਚ ਤੰਗ ਕਰਨ ਦਾ ਇਲਜ਼ਾਮ ਲਾਇਆ ਹੈ। ਪੁਲਿਸ ਨੇ ਅਯੂਬ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਰੇਸ਼ਮਾ ਦਾ ਕਹਿਣਾ ਸੀ ਕਿ ਉਸ ਦੇ ਬੇਟੇ ਦੇ ਖੇਡਣ ’ਤੇ ਗੁਆਂਢੀ ਇਤਰਾਜ਼ ਕਰਦੇ ਸਨ ਅਤੇ ਅਕਸਰ ਉਸ ਨਾਲ ਝਗੜਾ ਕਰਦੇਸਨ। ਰੇਸ਼ਮਾ ਨੇ 30 ਮਈ ਨੂੰ ਲਿਖੀ ਫ਼ੇਸਬੁਕ ਪੋਸਟ ਵਿਚ ਵੀ ਇਸ ਗੱਲ ਦਾ ਜ਼ਿਕਰ ਕੀਤਾ ਸੀ। ਗ੍ਰਿਫ਼ਤਾਰ ਸ਼ਖ਼ਸ ਦੇ ਪਰਵਾਰ ਨੇ ਰੇਸ਼ਮਾ ਦੇ ਬੱਚੇ ਦੇ ਰੌਲਾ ਪਾਉਣ ਕਾਰਨ ਅਪਣੀ ਸੁਸਾਇਟੀ ਵਿਚ ਸ਼ਿਕਾਇਤ ਵੀ ਕੀਤੀ ਸੀ। ਅਯੂਬ ਨੇ ਕਿਹਾ ਹੈ ਕਿ ਉਨ੍ਹਾਂ ਦੇ ਪਰਵਾਰ ਦੇ ਇਕ ਮੈਂਬਰ ਨੂੰ ਗੰਭੀਰ ਬੀਮਾਰੀ ਹੈ ਅਤੇ ਰੇਸ਼ਮਾ ਦੇ ਬੱਚੇ ਦੇ ਰੌਲਾ ਪਾਉਣ ਕਾਰਨ ਉਹ ਸੌਂ ਨਹੀਂ ਸਨ ਸਕਦੇ।