ਲਖਨਊ : ਯੂਪੀ ਦੇ ਅਯੋਧਿਆ ਵਿਚ ਅੱਜ ਦੁਪਹਿਰੇ ਵੱਡਾ ਹਾਦਸਾ ਵਾਪਰ ਗਿਆ। ਇਥੇ ਗੁਪਤਾਰ ਘਾਟ ’ਤੇ ਸਰਯੂ ਨਦੀ ਵਿਚ ਨਹਾਉਣ ਦੌਰਾਨ ਇਕੋ ਪਰਵਾਰ ਦੇ 15 ਜੀਅ ਡੁੱਬ ਗਏ। ਹਾਦਸੇ ਵਿਚ ਹੁਣ ਤਕ 5 ਜਣਿਆਂ ਦੀ ਮੌਤ ਹੋ ਚੁਕੀ ਹੈ। ਉਨ੍ਹਾਂ ਦੀਆਂ ਲਾਸ਼ਾਂ ਮਿਲ ਗਈਆਂ ਹਨ। 4 ਲਾਪਤਾ ਹਨ ਜਦਕਿ 6 ਜਣੇ ਬਚਾ ਲਏ ਗਏ। ਇਨ੍ਹਾਂ ਵਿਚੋਂ 3 ਨੂੰ ਹਸਪਤਾਲ ਵਿਚ ਦਾਖ਼ਲ ਕਰਾਇਆ ਗਿਆ ਹੈ। ਆਗਰਾ ਦੇ ਸਿਕੰਦਰਾ ਦਾ ਰਹਿਣਾ ਵਾਲਾ 15 ਜੀਆਂ ਦਾ ਪਰਵਾਰ ਅੱਜ ਅਯੋਧਿਆ ਪੁੱਜਾ। ਦੁਪਹਿਰ ਸਮੇਂ ਸਾਰੇ ਜੀਅ ਘਾਟ ਵਿਚ ਇਸ਼ਨਾਨ ਕਰ ਰਹੇ ਸਨ ਕਿ ਪਰਵਾਰ ਦੀਆਂ ਦੋ ਔਰਤਾਂ ਦੇ ਪੈਰ ਤਿਸਲ ਗਏ ਅਤੇ ਨਦੀ ਦੇ ਤੇਜ਼ ਵਹਾਅ ਵਿਚ ਫਸ ਗਈਆਂ। ਉਨ੍ਹਾਂ ਨੂੰ ਬਚਾਉਣ ਲਈ ਆਲੇ ਦੁਆਲੇ ਨਹਾ ਰਹੇ ਪਰਵਾਰ ਦੇ ਹੋਰ ਜੀਅ ਅੱਗੇ ਆਏ। ਉਹ ਵੀ ਪਾਣੀ ਦੇ ਤੇਜ਼ ਵਹਾਅ ਵਿਚ ਫਸ ਗਏ ਅਤੇ ਚੀਕ-ਚਿਹਾੜਾ ਮਚ ਗਿਆ। ਆਵਾਜ਼ ਸੁਣ ਕੇ ਲੋਕਾਂ ਨੇ ਪੁਲਿਸ ਨੂੰ ਸੂਚਨਾ ਦਿਤੀ ਅਤੇ ਗੋਤਾਖੋਰਾਂ ਦੀ ਟੀਮ ਪਹੁੰਚੀ ਤੇ ਬਚਾਅ ਕਾਰਜ ਸ਼ੁਰੂ ਕੀਤਾ ਗਿਆ। ਇਸ ਦੌਰਾਨ ਪਰਵਾਰ ਦੇ ਤਿੰਨ ਜੀਅ ਕਿਸੇ ਤਰ੍ਹਾਂ ਬਾਹਰ ਆ ਗਏ ਜਦਕਿ 3 ਕੁੜੀਆਂ ਨੂੰ ਗੋਤਾਖੋਰਾਂ ਨੇ ਬਚਾ ਲਿਆ। ਔਰਤਾਂ ਸਮੇਤ ਪਰਵਾਰ ਦੇ 9 ਜੀਅ ਰੁੜ੍ਹ ਗਏ। ਤਲਾਸ਼ੀ ਮੁਹਿੰਮ ਦੌਰਾਨ ਇਕ ਘੰਟੇ ਮਗਰੋਂ 5 ਲਾਸ਼ਾਂ ਮਿਲੀਆਂ ਜਦਕਿ 4 ਜਣਿਆਂ ਦਾ ਹਾਲੇ ਕੋਈ ਪਤਾ ਨਹੀਂ। ਮੌਕੇ ’ਤੇ ਡਿਪਟੀ ਕਮਿਸ਼ਨਰ ਅਨੁਜ ਕੁਮਾਰ ਝਾਅ ਅਤੇ ਪੁਲਿਸ ਅਧਿਕਾਰੀ ਪਹੁੰਚੇ। ਬਚਾਅ ਕਾਰਜ ਜਾਰੀ ਹਨ ਅਤੇ ਲਾਪਤਾ ਲੋਕਾਂ ਨੂੰ ਲਭਿਆ ਜਾ ਰਿਹਾ ਹੈੇ।