ਇੰਫਾਲ : ਮਨੀਪੁਰ ਪੁਲਿਸ ਨੇ ਚੁਰਾਚੰਦਪੁਰ ਜ਼ਿਲੇ ਦੇ ਦੋ ਪਿੰਡਾਂ ਵਿੱਚ ਤਲਾਸ਼ੀ ਮੁਹਿੰਮ ਦੌਰਾਨ ਭਾਰੀ ਮਾਤਰਾ ’ਚ ਹਥਿਆਰ ਅਤੇ ਗੋਲਾ ਬਾਰੂਦ ਬਰਾਮਦ ਕੀਤਾ ਹੈ। ਪੁਲਿਸ ਨੇ ਇੱਕ ਬਿਆਨ ’ਚ ਇਹ ਜਾਣਕਾਰੀ ਦਿੱਤੀ। ਸੁਰੱਖਿਆ ਬਲਾਂ ਨੇ ਸਨਿਚਰਵਾਰ ਨੂੰ ਡੀ ਹਾਲੇਨਜੰਗ ਪਿੰਡ ਦੇ ਬਾਹਰੀ ਇਲਾਕੇ ਤੋਂ ਚਾਰ ਹਥਿਆਰ, ਇੱਕ ਆਧੁਨਿਕ ਅਤੇ ਲੰਬੀ ਦੂਰੀ ਦਾ ਭਾਰੀ ਮੋਰਟਾਰ ਬਰਾਮਦ ਕੀਤਾ। ਇਸ ਦੇ ਨਾਲ ਹੀ 12000 ਰੁਪਏ ਦੇ ਨਕਲੀ ਨੋਟ ਵੀ ਜ਼ਬਤ ਕੀਤੇ ਗਏ ਹਨ। ਪੁਲਿਸ ਕੰਟਰੋਲ ਰੂਮ ਵਲੋਂ ਜਾਰੀ ਇੱਕ ਬਿਆਨ ’ਚ ਕਿਹਾ ਗਿਆ ਹੈ ਕਿ ਇੱਕ ਹੋਰ ਤਲਾਸ਼ੀ ਮੁਹਿੰਮ ’ਚ ਪੁਲਿਸ ਟੀਮ ਨੇ ਚੁਰਾਚੰਦਪੁਰ ਦੇ ਮੋਲਜੁੰਗ ਪਿੰਡ ਤੋਂ 10 ਬੰਦੂਕਾਂ, 8 ਜਿਲੇਟੀਨ ਦੀਆਂ ਛੜੀਆਂ ਅਤੇ ਗੋਲਾ ਬਾਰੂਦ ਬਰਾਮਦ ਕੀਤਾ।