ਨਾਬਾਲਗ਼ਾ ਨਾਲ ਸਮੂਹਕ ਬਲਾਤਕਾਰ

ਮੁੰਬਈ : ਕਿਸੇ ਇਕ ਇਲਾਕੇ ਵਿਚ ਨਹੀਂ ਪੂਰੇ ਦੇਸ਼ ਵਿਚ ਹੀ ਬਲਾਤਕਾਰ ਦੀਆਂ ਵਾਰਦਾਤਾਂ ਅਕਸਰ ਵੇਖਣ ਸੁਨਣ ਨੂੰ ਮਿਲ ਹੀ ਜਾਂਦੀਆਂ ਹਨ। ਇਸੇ ਤਰ੍ਹਾਂ ਉੱਤਰ ਮੁੰਬਈ ਦੇ ਮਲਵਾਨੀ ਵਿਚ ਅਪਣੇ ਦੋਸਤ ਦੇ ਜਨਮਦਿਨ ਦੀ ਪਾਰਟੀ ਵਿਚ ਸ਼ਾਮਲ ਹੋਣ ਗਈ 16 ਸਾਲਾ ਨਾਬਾਲਗ਼ਾ ਨਾਲ ਸਮੂਹਕ ਜਬਰ ਜਨਾਹ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਿਸ ਦੇ ਇਕ ਅਧਿਕਾਰੀ ਨੇ ਸਨਿਚਰਵਾਰ ਨੂੰ ਦਸਿਆ ਕਿ ਮੰਗਲਵਾਰ ਰਾਤ ਇਹ ਘਟਨਾ ਵਾਪਰੀ ਸੀ ਅਤੇ ਇਸ ਮਾਮਲੇ ਵਿਚ ਹੁਣ ਤਕ 6 ਲੋਕਾਂ ਨੂੰ ਗਿ੍ਰਫ਼ਤਾਰ ਕੀਤਾ ਗਿਆ ਹੈ ਅਤੇ 7ਵੇਂ ਦੋਸ਼ੀ ਦੀ ਭਾਲ ਜਾਰੀ ਹੈ। ਉਨ੍ਹਾਂ ਕਿਹਾ,‘‘ਕੁੜੀ ਅਪਣੇ ਦੋਸਤ ਦੀ ਜਨਮ ਦਿਨ ਪਾਰਟੀ ’ਚ ਸ਼ਾਮਲ ਹੋਣ ਲਈ ਅਪਣੇ ਘਰ ਦਾ ਦਰਵਾਜ਼ਾ ਬਾਹਰੋਂ ਬੰਦ ਕਰ ਕੇ ਚਲੀ ਗਈ ਤਾਂ ਕਿ ਉਸ ਦੇ ਪ੍ਰਵਾਰ ਵਾਲੇ ਉਸ ਨੂੰ ਰੋਕ ਨਾ ਸਕਣ। ਅਗਲੇ ਦਿਨ ਉਸ ਨੇ ਪੇਟ ਵਿਚ ਦਰਦ ਦੀ ਸ਼ਿਕਾਇਤ ਕੀਤੀ ਅਤੇ ਅਪਣੇ ਪ੍ਰਵਾਰ ਨੂੰ ਸਮੂਹਕ ਜਬਰ ਜਨਾਹ ਹੋਣ ਦੀ ਜਾਣਕਾਰੀ ਦਿਤੀ। ਉਸ ਨੇ ਸ਼ਿਕਾਇਤ ਵਿਚ 7 ਲੋਕਾਂ ਦੇ ਨਾਮ ਦਰਜ ਕਰਵਾਏ ਹਨ, ਜਿਨ੍ਹਾਂ ’ਚੋਂ ਸ਼ੁਕਰਵਾਰ ਰਾਤ ਨੂੰ 6 ਲੋਕਾਂ ਨੂੰ ਗਿ੍ਰਫ਼ਤਾਰ ਕਰ ਲਿਆ ਗਿਆ ਹੈ।’’ ਮਲਵਾਨੀ ਥਾਣੇ ਦੀ ਅਧਿਕਾਰੀ ਨੇ ਦਸਿਆ ਕਿ 7 ਦੋਸ਼ੀਆਂ ’ਤੇ ਜਬਰ ਜਨਾਹ, ਅਪਰਾਧਕ ਧਮਕੀ, ਜਬਰਨ ਵਸੂਲੀ ਸਮੇਤ ਹੋਰ ਅਪਰਾਧਾਂ ਦੇ ਅਧੀਨ ਮਾਮਲੇ ਦਰਜ ਕੀਤੇ ਗਏ ਹਨ। ਪੁਲਿਸ ਹੁਣ ਇਸ ਤਫ਼ਤੀਸ਼ ਵਿਚ ਲੱਗ ਗਈ ਹੈ ਕਿ ਜੇਕਰ ਇਸ ਜੁਰਮ ਵਿਚ ਹੋਰ ਵੀ ਕੋਈ ਦੋਸ਼ੀ ਹੈ ਤਾਂ ਉਸ ਨੂੰ ਵੀ ਬਖਸਿ਼ਆ ਨਹੀ ਜਾਵੇਗਾ।