ਮੰਦਿਰਾ ਬੇਦੀ ਨੇ ਅਪਣੇ ਪਤੀ ਰਾਜ ਕੌਸ਼ਲ ਦੀ ਮ੍ਰਿਤਕ ਦੇਹ ਨੂੰ ਦਿਤਾ ਮੋਢਾ

ਮੁੰਬਈ: ਅਦਾਕਾਰਾ ਮੰਦਿਰਾ ਬੇਦੀ ਦੇ ਪਤੀ ਅਤੇ ਫ਼ਿਲਮਕਾਰ ਰਾਜ ਕੌਸ਼ਲ ਦਾ ਬੁਧਵਾਰ ਨੂੰ 49 ਸਾਲ ਦੀ ਉਮਰ ਵਿਚ ਦਿਹਾਂਤ ਹੋ ਗਿਆ। ਪਰਵਾਰ ਦੇ ਕਰੀਬੀ ਦੋਸਤ ਨੇ ਦਸਿਆ ਕਿ ਰਾਜ ਨੂੰ ਸਵੇਰੇ 4.30 ਵਜੇ ਦਿਲ ਦਾ ਦੌਰਾ ਪਿਆ ਸੀ। ਉਸ ਨੇ ਹਸਪਤਾਲ ਵਿਚ ਆਖ਼ਰੀ ਸਾਹ ਲਿਆ। 11 ਵਜੇ ਰਾਜ ਦੀ ਉਸ ਦੇ ਘਰ ਤੋਂ ਅੰਤਮ ਯਾਤਰਾ ਨਿਕਲੀ ਜਿਸ ਦੀਆਂ ਫ਼ੋਟੋਆਂ ਅਤੇ ਵੀਡੀਓ ਸੋਸ਼ਲ ਮੀਡੀਆ ਵਿਚ ਚੱਲ ਰਹੀਆਂ ਹਨ ਜਿਨ੍ਹਾਂ ਵਿਚ ਮੰਦਿਰਾ ਬੇਦੀ ਜ਼ਾਰ-ਜ਼ਾਰ ਰੋ ਰਹੀ ਹੈ। ਕਈ ਤਸਵੀਰਾਂ ਵਿਚ ਉਹ ਅਪਣੇ ਪਤੀ ਦੀ ਦੇਹ ਨੂੰ ਮੋਢਾ ਦਿੰਦੇ ਵਿਖਾਈ ਦੇ ਰਹੀ ਹੈ। ਰਾਜ ਦੇ ਦਿਹਾਂਤ ਦੀ ਖ਼ਬਰ ਪਤਾ ਲੱਗਣ ਮਗਰੋਂ ਕਈ ਫ਼ਿਲਮੀ ਹਸਤੀਆਂ ਨੇ ਮੀਡੀਆ ਰਾਹੀਂ ਉਸ ਨੂੰ ਸ਼ਰਧਾਂਜਲੀ ਦਿਤੀ। ਰਾਜ ਨੇ ਅਦਾਕਾਰ ਵਜੋਂ ਅਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਫਿਰ ਉਸ ਨੇ ਅਪਣੇ ਕਰੀਅਰ ਵਿਚ ਕਈ ਫ਼ਿਲਮਾਂ ਦਾ ਨਿਰਦੇਸ਼ਨ ਕੀਤਾ। ਮੰਦਿਰਾ ਅਤੇ ਰਾਜ ਦਾ ਵਿਆਹ 14 ਫ਼ਰਵਰੀ 1999 ਨੂੰ ਹੋਇਆ ਸੀ। ਦੋਹਾਂ ਦੇ ਇਕ ਬੇਟਾ ਅਤੇ ਇਕ ਬੇਟੀ ਹੈ। ਰਾਜ ਅਤੇ ਮੰਦਿਰਾ ਨੇ ਪਿਛਲੇ ਸਾਲ ਹੀ ਬੇਟੀ ਤਾਰਾ ਨੂੰ ਗੋਦ ਲਿਆ ਹੈ। ਦੋਹਾਂ ਦੀ ਪਹਿਲੀ ਮੁਲਾਕਾਤ ਮੁਕੁਲ ਆਨੰਦ ਦੇ ਘਰ ਹੋਈ ਸੀ। ਮੰਦਿਰਾ ਇਥੇ ਆਡੀਸ਼ਨ ਦੇਣ ਪੁੱਜੀ ਸੀ ਅਤੇ ਰਾਜ, ਮੁਕੁਲ ਦੇ ਸਹਾਇਕ ਵਜੋਂ ਕੰਮ ਕਰ ਰਹੇ ਸਨ। ਇਥੋਂ ਹੀ ਦੋਹਾਂ ਦੇ ਪਿਆਰ ਦੀ ਸ਼ੁਰੂਆਤ ਹੋਈ।