ਮੰਡੀ ਗੋਬਿੰਦਗੜ੍ਹ : ਨਗਰ ਕੌਂਸਲ ਮੰਡੀ ਗੋਬਿੰਦਗੜ੍ਹ ਅਧੀਨ ਆਉਂਦੇ ਅਜਨਾਲੀ ਵਾਰਡ ਨੰਬਰ 09 ਦੀ ਸੜਕ ਸਬੰਧੀ ਲੋਕਾਂ ਨੂੰ ਦਰਪੇਸ਼ ਦਿੱਕਤਾਂ ਬਾਬਤ ਕਾਰਜ ਸਾਧਕ ਅਫਸਰ, ਮੰਡੀ ਗੋਬਿੰਦਗੜ੍ਹ, ਸ਼੍ਰੀ ਕੇ. ਐੱਸ. ਬਰਾੜ ਨੇ ਦੱਸਿਆ ਕਿ ਸਬੰਧਤ ਸੜਕ ਵਿੱਚ ਮੇਨ ਸੀਵਰ ਪਾਉਣ ਦਾ ਕੰਮ ਸਾਲ 2020 ਵਿੱਚ ਕੀਤਾ ਗਿਆ ਸੀ। ਸੀਵਰ ਪੈਣ ਤੋਂ ਲਗਭਗ ਇਕ ਸਾਲ ਬਾਅਦ ਇਸ ਸੜਕ 'ਤੇ ਪੱਥਰ ਪਾਉਣ ਦਾ ਕੰਮ ਕੀਤਾ ਗਿਆ ਤਾਂ ਜੋ ਸੜਕ ਦੀ ਪੂਰੀ ਤਰ੍ਹਾਂ ਕਮਪੈਕਸ਼ਨ ਹੋ ਸਕੇ। ਪੱਥਰ ਪੈਣ ਤੋਂ ਲਗਭਗ ਦੋ ਸਾਲ ਬਾਅਦ ਇਸ ਸੜਕ 'ਤੇ ਬਿਟੂਮੀਨਸ ਮੈਕਾਡੈਮ (ਬੀ.ਐਮ.) ਅਤੇ ਸੈਮੀ ਡੈਂਸ ਬਿਟੂਮੀਨਸ ਕੰਕਰੀਟ (ਐਸ.ਡੀ.ਬੀ.ਸੀ.) ਦਾ ਕੰਮ ਕਰਵਾਇਆ ਗਿਆ।
ਬਰਸਾਤ ਦੇ ਮੌਸਮ ਵਿੱਚ ਇੱਕ ਦੋ-ਥਾਂ ਤੋਂ ਟਰੈਂਚ ਦੇ ਬੈਠਣ ਨਾਲ ਸੜਕ ਵਿੱਚ ਖੱਡਾ ਬਣ ਗਿਆ ਹੈ, ਜਿਸ ਨੂੰ ਰਿਪੇਅਰ ਕਰਵਾਉਣ ਸਬੰਧੀ ਕਾਰਵਾਈ ਕੀਤੀ ਜਾ ਰਹੀ ਹੈ ਤੇ ਬਾਕੀ ਸੜਕ ਠੀਕ ਹੈ।
ਕਾਰਜਸਾਧਕ ਅਫਸਰ ਨੇ ਕਿਹਾ ਕਿ ਨਗਰ ਕੌਂਸਲ ਮੰਡੀ ਗੋਬਿੰਦਗੜ੍ਹ ਲੋਕਾਂ ਦੀਆਂ ਮੁਸ਼ਕਲਾਂ ਦੇ ਹੱਲ ਲਈ ਵਚਨਬੱਧ ਹੈ ਤੇ ਲੋਕਾਂ ਨੂੰ ਕਿਸੇ ਕਿਸਮ ਦੀ ਦਿੱਕਤ ਨਹੀਂ ਆਉਣ ਦਿੱਤੀ ਜਾਵੇਗੀ। ਉਹਨਾਂ ਕਿਹਾ ਕਿ ਜਿਹੜੀਆਂ ਦਿੱਕਤਾਂ ਦਰਪੇਸ਼ ਹਨ, ਉਹ ਲਗਾਤਾਰ ਦੂਰ ਕੀਤੀਆਂ ਜਾ ਰਹੀਆਂ ਹਨ। ਜੇਕਰ ਫੇਰ ਵੀ ਕੋਈ ਦਿੱਕਤ ਆਉਂਦੀ ਹੈ ਤਾਂ ਉਹਨਾਂ ਦੇ ਧਿਆਨ ਵਿੱਚ ਲਿਆਂਦੀ ਜਾਵੇ, ਉਹ ਉਸ ਦੇ ਹੱਲ ਲਈ ਫੌਰੀ ਕਾਰਵਾਈ ਅਮਲ ਵਿੱਚ ਲੈਕੇ ਆਉਣਗੇ।